शनिबार राजधानीमा आयोजित कार्यक्रममा बोल्दै अध्यक्ष ठाकुरले भने,‘अहिले मधेश अशान्त अवस्थामा छ, जनतामा आक्रोश छ, ठाउँ–ठाउँमा आन्दोलनहरु भैरहेका छन्, यस्तो अवस्थाम एमाले जस्तो विगतमा सरकारमा बसेको र फेरि पनि सरकारको नेतृत्व लिन सक्ने पार्टीले गलत समयमा गलत काम गरेको छ, यसले जनतामा गलत सन्देश प्रवाह भएको छ, यसले वातावरणलाई बिर्गाछ, स्थितिलाई भड्काउँछ, यो अभियानले परिस्थिति असहज बन्छ, अभियानबाट उत्पन्न परिस्थितिको जिम्मेवारी एमालेले नै लिनुपर्छ।’ उनले एमालेको अभियानले असहज स्थिति पैदा हुने खतरा औंल्याए।

उनले अहिले आफूहरु शान्तिपूर्ण आन्दोलनमा रहेको भन्दै यदि एमाले लठ्ठी लिएर आए उसले मधेशमा नमस्कार नपाउने टिप्पणी गरे । यद्धपी उनले आफूहरु मधेशमा द्धन्द्ध नभएर शान्तिपूर्ण आन्दोलनको पक्षमा रहेको स्पष्ट पारे।

उनले संविधान संशोधन प्रस्ताव पारित नभएसम्म देशमा कुनैपनि चुनाव हुन नसक्ने दाबी समेत गरे ।
अध्यक्ष ठाकुरले संविधान जारी गरेझैं बलजफ्ती गरेर चुनाव गर्न खोजिए देशको अवस्था भयावह हुने समेत चेतावनी दिए ।

स्थानीय तह पूर्नसंरचना आयोगको प्रतिवेदनलाई आफूहरुले पहिलेदेखि नै अस्विकार गरेको बताउँदै भने,‘पूर्नसंरचना गर्दा जनसंख्यालाई ध्यान दिईएन, ५१ प्रतिशत जनताले जम्मा ३५ प्रतिशत पाउने अवस्था छ, तर ४९ प्रतिशतले ६५ प्रतिशत पाउने भएका छन्, यो अवैज्ञानिक र अव्यवहारिक हो, यसलाई सच्याउनुको विकल्प छैन।’

ठाकुरले जनसंख्याको आधारमा पूर्नसंरचना नगर्दा बजेट विनियोजनमा समेत असर पार्ने चिन्ता व्यक्त गरे।