१२, काठमाडौं । पूर्व मन्त्री तथा जनजाति आन्दोलनका नेता गोरेबहादुर खपाङ्गीको गएराति निधन भएको छ । न्यूरो अस्पताल बाँसबारीमा उपचारको क्रममा हिजो राति १० बजेर २२ मिनेटमा उनको निधन भएको आईफाका महासचिव सञ्जोग लाफा मगरले जानकारी दिए ।
नेपाल अन्तर्राष्ट्रिय अन्तर्राष्ट्रिय आदिवासी जनजाति चलचित्र महोत्सवमा सहभागी हुन जाने क्रममा राष्ट्रिय सभागृह अगाडि २०७० बैशाख १२ गते मोटरसाइकलले ठक्कर दिएपछि उनी लगातार उपचार गराइरहेका थिए । ठक्करले उनको टाउकोमा चोट लागेको थियो । उपचारको लागि उनलाई सिंगापुरसमेत लगिएको थियो ।
२००३ साउन २५ मा उदयपुरको थाक्लेमा जन्मिएका खपाङ्गीको परिवार महोत्तरीको रामनगरमा बसाईं सरी आएको थियो । हाल उनको परिवार ललितपुरको नख्खुमा डेरा गरी बसेको छ । उनको २ छोरा र २ छोरी छन् ।
२०५९ मा तत्कालिन राजा ज्ञानेन्द्रको मन्त्रिमण्डलमा खपाङ्गी महिला बालबालिका तथा समाज कल्याण मन्त्री भएका थिए । जनजातिहरुले दशैं मनाउन नहुँदै तर्क गर्दै आएका खपाङ्गीले त्यही समयमा राजाको हातबाट दशैंको टीका थापेको दृश्य सार्वजनिक भएपछि उनी विवादमा तानिएका थिए ।
