काठमाडौं । आईसीसी विश्व क्रिकेट लिग च्याम्पियनसिपको अन्तिम खेलमा नेपालबिरुद्ध युनाइटेड अरब इमिरेट्स ९युएई० ले आफ्नो छैटौं विकेट गुमाएको छ । 

शेख जायद क्रिकेट रंगशालामा नेपालविरुद्ध टस हारेर पहिले ब्याटिङ गरिरहेको युएईले छैटौं  विकेटको रुपमा मोहमत बोटालाई ३७ रनमा गुमाएको हो । उनलाई नेपालका सागर पुन आउट गरे  ।  

नेपालविरुद्ध छैटौं  विकेट गुमाएसँगै ४० ओभरको खेल जारी रहँदा युएईले ६ विकेट गुमाएर १३४ रन बनाएको छ । युएईका एड्नन मुफ्ति ६० रन बनाएर अविजित छन् ।

यसअघि युएईका कप्तान रोहन मुस्ताफा ८ रनमा आउट भएका थिए । त्यस्तै उस्मान महमद ५,  अस्फाक अहमेद ४ र  रामिज साहजाद ३ रनमा आउट हुँदा गुलाम सब्बीर सुन्य रनमा पेभेलियन फर्किए । नेपालका सोमपाल कामीले ४ तथा कप्तान पारस खड्काले १ विकेट लिएका छन् ।

बुधबार भएको पहिलो खेलमा युएईसँग हार ब्यहोरेको नेपाल अन्तिम खेलमा भने जित हात पार्ने रणनीतिको साथमा मैदानमा उत्रिएको छ । युएईविरुद्धको पहिलो खेलमा नेपाल ७ विकेटले पराजित भएको थियो ।

च्याम्पियनसिपबाट विश्वकप छनोटमा पुग्न र डिभिजन २ मा घटुवा भएको दुवै टोलीका लागि यो खेल प्रतिष्ठाको रुपमा मात्र रहने छ ।  यस्तै यो खेललाई आगमी फेब्रुअरीमा नामिवियामा हुने आईसीसी विश्व क्रिकेट लिग डिभिजन २ प्रतियोगिताको तयारीको रुपमा लिइएको छ ।

नामिवियामा हुने डिभिजन २ मा  नेपालसहित युएई, नामिबिया, केन्या, ओमन र क्यानाडाले प्रतिस्पर्धा गर्ने छन् । डिभिजन २ मा शीर्ष दुईमा रहने टिम विश्वकप छनोटमा प्रवेश गर्नेछन् । आईसीसी विश्व क्रिकेट लिग च्याम्पियनसिपबाट नेदरल्याण्ड, स्कटल्याण्ड, पपुवा न्युगिनी र हङकङ भने विश्वकप छनोटमा प्रवेश गरिसकेका छन् ।