भोजपुरमा स्थानीय पुनःसंरचनाका लागि सुझाव सङ्कलन हुदै

१५ भदौ, भोजपुर । भोजपुरमा स्थानीय पुनःसंरचनासम्बन्धी सुझाव सङ्कलन गर्न थालेका छन् । जिल्लामा पुनःसंरचनासम्बन्धी धेरै विवाद आउन थो पछि सुझाव सङ्कलन गर्न थालेका हुन् ।

जिल्लाको पश्चिमी गाविस लेखर्कमा खावा, कोट, गोगने र लेखर्कका सरोकारवालाले स्थानीय निकायको पुनःसंरचनासम्बन्धी सुझाव सङ्कलन गर्न थालेका छन् ।

सूर्यप्रसाद नेपालको अध्यक्षतामा एक समितिको गठन गरी मङ्गलबारदेखि सुझाव सङ्कलन गर्न थालेका हुन् । सुझाव सङ्कलन कार्यक्रममा चार गाविसको केन्द्र हुनेगरी गाउँपालिका निर्धारण गर्नुपर्ने र त्यसो नभए सम्बन्धित निकायमा गएर आन्दोलन गर्ने त्यहाँका स्थानीयवासीले निर्णय गरेको लेखर्कका प्रकाश दङ्गालले जानकारी दिनुभयो ।

पुनःसंरचना प्राविधिक समितिले अन्नपूर्ण गाउँपालिका नामाकरण गरी तिम्मा, कोट, गोगने, लेखर्क, खावा, नागी, अन्नपूर्ण र छिनामखु गाविसलाई एउटै गाउँपालिका बनाउने प्रस्ताव गरेकामा त्यसप्रति स्थानीयवासीले आपत्ति जनाएका छन् । त्यहाँका स्थानीयवासीले कोट, खावा, लेखर्क र गोगनेलाई एउटा गाउँपालिका बनाउन मागसमेत गर्दै आएका छन् ।