‘बसौं माननीय सदस्य, सदनको कारबाही अगाडि बढाऔं’

माघ २६, काठमाडौं  : माननीय सदस्यहरु हाम्रो आजसमेत गरेर तीनपटक बैठक अवरुद्ध भइसकेको छ । र, यो बैठकलाई अलि जीवन, अलि चलायमान र प्रभावकारी बनाउने हामी सबैको साझा उद्देश्य हो । र, मलाई १४ गते बधाई तथा शुभकामना दिँदै गर्दा सबै माननीय सदस्यहरुले खासगरी प्रतिपक्षी दलका नेताले समेत यो सदन निष्पक्ष होस् र सबैलाई समानताको व्यवहार होस् भनेर सुझाव दिनुभएको थियो । त्यो सुझावलाई मैले अहिले स्मरण गरिराखेको छु ।

मैले पटकपटक र सुरुका दिनदेखि पनि यो बैठकलाई अगाडि बढाएर मात्रै सदनको प्रभावकारिता हुन्छ भनेर मैले भनेको थिएँ । अहिले पनि मैले दोहोर्‍याउने कुरा के छ भने मैले यति मात्रै भन्न चाहन्छु कि तपाईंहरुलाई संविधानको व्यवस्था पनि धेरै राम्रोसँग थाहा छ । धारा १०५ मा सुस्पष्टरुपमा भनिएको छ र यो विषय अदालतमा गइसकेको छ । त्यसकारणले गर्दा पनि यहाँबाट निरुपण हुन सक्दैन भन्ने कुरा स्वत स्पष्ट छ । फेरि जनताको सर्वोच्च जनप्रतिनिधिमुलक संस्था भएको हुनाले आफ्ना सरोकारहरु र दलका भनाईहरु राख्न पनि पर्छ । दुई दिनसम्म तपाईंहरुले राखिसक्नु भएको छ । एउटा सन्देश पनि गइसकेको छ । त्यसकारण फेरि यहाँ मलाई अहिले पनि धेरै माननीय सदस्यहरुले हामी जिल्ला नगएर जनताका कुरा उठाउनका लागि यहाँ बसिरहेका छौं । हामीलाई बोल्ने वातावरण बनाउनुपर्छ भनेर अत्यन्त धेरै अनुरोध गरिराख्नुभएको छ ।

यो परिप्रेक्ष्यमा दुई दिनसम्म तपाईंहरुले कुरा उठाइसक्नु भएको छ र यहाँबाट ती कुराहरु अगाडि बढ्न नसक्ने कुरा स्वतः सिद्ध पनि छ ।

पहिलो कुरा त, एउटा संवैधानिक आयोगले गरेको निर्णय भयो । दोस्रो कुरा, अदालतमा गइसकेको विषय भयो । त्यसकारणले गर्दा म मानीय सदस्यहरुलाई विशेष अनुरोध के गर्दछु भने तपाईंहरु बसिदिनुहोस् । यो सदन सुचारु गर्नका लागि सहयोग गर्नुहोस् । यसले नै हाम्रो यो सदनको ओज, गरिमा र यसको सर्वोच्चता कायम रहन्छ भनेर म अनुरोध गर्न चाहन्छु ।

(सदन अवरोध गरिरहेका कांग्रेस सांसदहरुले बोल्न समय मागिरहेका थिए तर, सभामुखले माइक दिएनन् । माइकबिनै कांग्रेस सांसदले केही बोलिराखे । झण्डै १ मिनेटपछि …)

माननीय सदस्य । मैले तपाईंको कुरा बुझिसकेँ । मैले तपाईंलाई समय दिएको पनि छैन । त्यसकारण आफ्नो भनाईलाई बिट मार्नुस् । माननीय सदस्य, मैले तपाईंका कुरा बुझेँ । किनभने दुई दिनसम्म मैले धेरै धेरै गम्भीरतापूर्वक, धेरै शालिनतापूर्वक मैले कुरा सुनिसकेको छु । र, मैले बारबार अनुरोध गरेको छु कि यो हाम्रो व्यवस्थापिक संसदको कार्यक्षेत्रभित्र पर्दैन नम्बर एक । नम्बर दुई हामी त जानकार छौं । तपाईंहरुलाई निकै राम्रोसँग जानकारी छ, संविधानको धारा १०५ को पनि जानकारी छ । त्यसैगरी नियमावलीको नियम २१ को घ को पनि निकै राम्रोसँग जानकारी छ । त्यसकारण फेरि, यो कुरा पनि त्यत्तिकै साँचो हो कि यो कुरा मलाई राम्रोसँग हेक्का छ कि हामी जनताको जननिर्वाचित सर्वोच्च संस्थामा छौं । त्यसकारण, यो मुलुकका, यो राज्यका र यो राष्ट्रिय अन्तर्राष्ट्रिय सबै विषयहरु राख्ने थलो यही हो । तपाईंहरुले भरपूररुपमा दुई दिनसम्म सबिस्तार राखिसक्नु भएको छ । मैले असाध्यै धेरै गम्भीरतापूर्वक सुनेको छु । त्यसकारण, फेरि म अनुरोध गर्छु कि तपाईंहरु बसिदिनुहोस् । सदनको कारबाही अगाडि बढाऔं ।

पुनः म जोड दिएर के भन्न चाहन्छु भने छलफल गरेरै, तपाईंहरुका केही विषय छन् भने विशेष समयमा राख्न सकिन्छ, अरु समयमा बोल्न सकिन्छ । ब्याख्या गर्नुहोस् । विहंगम् व्याख्या गर्नुस् र सबै भनुनँ यो त हामीलाई त नेपाली जनताले मात्रै होइन, अन्तर्राष्ट्रिय जगतबाट पनि हेरिरहेका छन् । हाम्रा काम कारबाहीलाई नजिकबाट नियालिरहेका छन् । त्यसकारण यो लोकतन्त्रको विकास, विस्तार, सुदृढीकरणका यो सदनलाई गतिशील, चलायमान, जीवन्त बनाउनका लागि छलफल गर्ने एकमात्र विकल्प हो । छलफलको ढोका खोलिदिनुहोस् । म फेरि पनि विनम्रतापूर्वक तपाईंहरुलाई जोडदाररुपमा आग्रह गर्दछु कि तपाईंहरु बस्नुस् । मलाई सदन चलाउनका लागि सहयोग गर्नुस् ।

(सदन अवरोध गर्दै उठिरहेका कांग्रेस सांसदहरु पुनः बोल्नका लागि समय माग्छन् …)

माननीय सदस्यहरु, मैले दुई दिनसम्म बिस्तारपूर्वक सुनिसकेको छु र तपाईंहरु उभिइराख्नुभएको छ । यो प्रमुख प्रतिपक्षी दल उभिइराख्नु भनेको सदनको अवरुद्धता हो । यो अवरुद्धताको स्थितिमा मैले सदनको कारबाहीलाई अगाडि बढाउन उचित ठानेको छैन । त्यसकारण यो बैठक २०७६ माघ २८ गते मंगलबार दिनको १ बजे बस्नेगरी यहीँ स्थगित हुन्छ ।

(आइतबार बसेको संसदको बैठक नेपाली कांग्रेसले तेस्रो दिन पनि अवरोध गरेपछि सभामुख सापकोटाले सदनमा विचार गरेको विचारको अंश)