नेकपा स्थायी समिति बैठकः सुरुमा अध्यक्षद्वयको मन्तव्य, पाँच एजेण्डाहरु तय

सत्तारूढ नेपाल कम्युनिष्ट पार्टी (नेकपा)को स्थायी समिति बैठक सुरु भएको छ । प्रधानमन्त्रीको सरकारी निवास बालुवाटारमा सुरु भएको स्थायी समितिको बैठक ६ महिनापछि बसेको हो ।

बैठकमा अमेरिकी सहयोग सम्बन्धी सम्झौता मिलेनियम च्यालेन्ज कर्पोरेशन (एमसीसी) विवादका विषयमा छलफल हुनेछ । पार्टीभित्र संसदबाट पारित गर्न हुने वा नहुने विषयमा दुई धार देखिएकाले त्यसमा साझा धारणा बनाउन बैठक बोलाइएको हो ।

यसअघि दुईपटक मिति तोकेर पनि स्थायी समिति बैठक स्थगित भएको थियो । बैठकमा अध्यक्षद्वय केपी शर्मा ओली र पुष्पकमल दाहाल प्रचण्डले राजनीतिक प्रतिवेदन प्रस्तुत गर्ने कार्यसूची तय भएको छ । लिखित भन्दा बुँदागत प्रतिवेदन पेश गर्ने तयारी छ ।

बैठकअघि छलफलको एजेण्डा भने स्थायी समितिका सदस्यहरूलाई जानकारी गराइएको थिएन ।

बैठकको सुरुमा वर्तमान परिस्थिति र स्थायी कमिटीको बैठकका सम्बन्धमा अध्यक्षद्वयले मन्तव्य राख्ने कार्यसूचि रहेको प्रधानमन्त्रीका प्रेस सल्लाहकार सूर्य थापाले जानकारी दिए । थापाका अनुसार सरकारको कामका सम्बन्धमा रोगको नियन्त्रण, रोकथाम र उपचारबारे, नेपालको सीमा, समस्या र समाधानबारे र अन्य विषयमा छलफल हुनेछ ।

तेस्रो एजेन्डामा पार्टी एकताका बाँकी कामहरु बारे छलफल हुने थापाले जनाए । चौथो एजेण्डाको रुपमा एमसिसीलाई राखिएको छ भने पाँचौं एजेण्डामा विविध रहेको छ ।