चीनमा कोरोनाको पछिल्लो अपडेट

कोरोना भाइरसको इपिसेन्टर मानिने चीनको वुहान शहरमा मंगलवार केवल एउटा कोरोना संक्रमण मात्र पुष्टि भयो । गत वर्ष डिसेम्बर महिनामा कोरोना भाइरसको प्रकोप सुरु हुँदादेखि अहिलेसम्म चीनमा ३२३७ मानिसले अहिलेसम्म ज्यान गुमाइसकेका छन् । संसारभर अहिलेसम्म ८०१३ जनाले ज्यान गुमाइसकेका छन् ।

चीन सरकारको व्यवस्थापन र सावधानीका कारण अब कोरोना संक्रमितको संख्या उल्लेख्यरुपमा घटिरहेका छन् । बिस्तारै कोरोनाले चीनबाट बिदा लिएको भन्न मिल्ने अवस्था सिर्जना हुँदै गएको छ ।

चीनको राष्ट्रिय स्वास्थ्य आयोग (एनएचसी)का अनुसार चीनमा मंगलबार कोरोनाको संक्रमणको कारण थप ११ मानिसको मृत्यू भएको छ भने १३ नयाँ संक्रमण भेटिएको छ ।

वुहान र हुबेई प्रान्त २३ जनवरीदेखि बन्द छ । सरकारले त्यहाँ तत्काल औद्योगिक गतिविधिहरु र अन्य कारोबारहरु सुरु गर्ने योजना बनाइरहेको छ । सबैभन्दा बढी प्रभावित रहेको वुहानमा भने मंगलवार केवल एकवटा मात्रै संक्रमणको घटना सार्वजनिक भयो ।

यसअघि फेब्रुअरी महिनामा जब हुबेई प्रान्तमा कोरोनाको संक्रमण उत्कर्षमा थियो त्यतिबेला एक दिनमै हजारौंलाई संक्रमण भएको थियो । अब यो आंकडा एकमा पुगेको छ ।

वुहान हुबई प्रान्तमा पर्छ । वुहानमा करिब १ करोड १० लाख मानिस बस्छन् । उनीहरुलाई २३ जनवरीदेखि एकदमै मुस्किल अवस्था सिर्जना भएको थियो । पछि पूरै प्रान्तलाई नै लक डाउन गरिएको थियो ।

अब चीनमा चिनियाँ नागरिकभन्दा बाहिरबाट आउने नागरिकको बढी चिन्ता बढिरहेको छ । उनीहरुमा संक्रमण भेटिन थालेपछि चिन्ता बढेको हो ।

सरकारी तथ्यांकका अनुसार हरेक दिन चीनमा २० हजार मानिसहरु आइरहेका हुन्छन् । चीनको १० प्रान्त र शहरबाहिरबाट आइरहेका मानिसहरुलाई अनिवार्यरुपमा क्वारेन्टाइनमा राख्ने गरिएको छ