यसलाई ‘भवन निर्माण इजाजत सरलीकरण तथा सहजीकरण संक्षिप्त कार्यविधि-२०७३’ नाम दिइएको छ । अब नक्सापास गर्दा घर/जग्गा धनी आफैं उपस्थित हुन नसक्ने भए मनासिब कारणसहितको निवेदन परेमा वारेश राख्न पाइने काठमाडौं महानगरपालिकाका कार्यकारी अधिकृत रुद्रसिंह तामाङले बताए ।
विदेशमा रहेका जग्गा धनीको हकमा भने राजदूतावासबाट प्राप्त अधिकृत वारेशनामा र अन्यको हकमा वारेशनामा लेख्दा महानगरपालिकाको कानुन महाशाखा वा सम्बन्धित वडा प्रशासकीय प्रमुखको रोहबरमा गर्नुपर्ने नियम ल्याइएको छ ।
महानगरपालिकाले अनियमितातालाई रोक्न अब नक्सा पास गर्ने र त्यसको अनुगमन गर्न छुट्टाछुट्टै टोली परिचालन गर्ने निर्णय पनि गरेको छ ।
अब सेवाग्रहीबाट नक्सा पासका लागि नियमअनुसार ईबिपिएसमार्फत आवेदन दिनुपर्नेछ । त्यस्ता नक्सा फाइल सम्बन्धित प्राविधिकमार्फत भवन निर्माण मापदण्ड र भवन निर्माण आचारसंहिता अनुरुप छ छैन जाँच गरेर तीन दिनभित्र लाग्ने दस्तूरसहित वडा कार्यालयमा पठाउनुपर्ने नियम बनाइएको छ ।
कार्यबिधिमा नक्सा दर्ता भइसकेपछि त्यस्ता फाइल सम्बन्धित कर्मचारीले मात्रै फाँट र वडामा फायल लैजाने व्यवस्था लागू गर्ने उल्लेख छ ।
अब नक्सा दर्ता, वडा कार्यालयमा सूचनाको टासका लागि फाइलको मुचुल्का, अस्थायी नक्सा पास, स्थायी नक्सा पास र निर्माण सम्पन्न इजाजतपत्रको सूचना सम्बन्धित घरधनीलाई एसएमएसमा जानकारी दिने व्यवस्था मिलाइएको छ ।
यसैगरी नक्सा पास तथा भवन निर्माण सम्पन्न प्रमाणपत्र बुझ्न सम्बन्धित घरधनी नै उपस्थित हुनुपर्ने र उपस्थित हुन सनसकेमा वारेसनामा लिनुपर्ने कार्यबिधिमा उल्लेख छ ।
अहिले महानगरपालिका नक्सापासको कामका लागि आर्थिक चलखेल हुने गरेको छ । सेवाग्राहीलाई अनावश्यक दुःख दिएर रकम अशुलक दलालदेखि कर्मचारी नै लाग्ने गरेका छन् ।
सेवाग्रहीसँग अनावश्यक लाभ लिने क्रम बन्द गर्न यस्तो नियम बनाइएको कार्यकारी तामाङले बताए । अहिले महानगरपालिकाले नक्सापास प्रक्रियाको अनुगमनका लागि छुट्टै कार्यदल पनि बनेको छ ।