नयाँ शक्तिको ‘काउन्टर’ एमालेलाई, समृद्धिको सपना कुनै काल्पनिक सपना होइन:डा. भट्टराई

ओलीको उट्पट्याङ् कुराले देश विखण्डनतिर जाने आरोप

११ चैत, भैरहवा । नयाँ शक्ति पार्टीका संयोजक डा. बाबुराम भट्टराई यतिबेला तराई मधेसको अभियानमा छन् । तीन दिन अघि लाहानबाट सुरु भएको नयाँशक्ति पार्टीको ‘हिमाल पहाड तराई मधेस अभियान’ शुक्रबार भैरहवा आइपुगेको छ ।
एमालेले दुई नम्बर प्रदेशमा मधेसी जनताको विरोधका कारण अभियान सञ्चालन गर्न नसके पनि बाबुरामको सभा कतै पनि अवरोध नभई अघि बढेको छ । यसवीचमा बुधबार र विहीबार सिराहाको लाहान र रौतहटको चन्द्रनिगाहापुरमा सभा सम्पन्न भएका छन् भने शुक्रबार भैरहवामा आमसभा सम्पन्न भएको छ ।
यसक्रममा नयाँ शक्ति पार्टीमा प्रवेश गर्नेहरुको पनि लहर देखिएको नयाँ शक्तिका नेताहरुले बताएका छन् ।

नयाँ शक्तिका नेताहरु बढीजसो एमाले र केपी ओलीको आलोचनामा केन्द्रित देखिएका छन् । उनीहरुको अभियान एक किसिमले एमालेको मेची महाकाली अभियानको ‘काउन्टर’ अभियानजस्तै देखिएको छ ।

‘सुँगुरसँग कुस्ती खेल्नु हुँदैन, खेलियो भने आफैंलाई फोहोर लाग्छ’ उहाँले भन्नुभयो, ‘हामी पुराना पार्टीहरुसँग कुस्ती खेल्न होइन, सुशासन र सदाचारयुक्त समृद्धिको शिखरतिर लम्किने अभियानमा छौं ।’

उहाँले नयाँ शक्तिको परिकल्पना सबैप्रकारको भ्रष्टाचारबाट मुक्त सुशासन र सदाचारयुक्त देश निर्माण भएको बताउनुभएको छ । उहाँले भन्नुभयो, ‘नयाँ शक्ति आजभन्दा २५०० वर्ष अघि गौतम बुद्धले विश्वलाई एउटा सन्देश दिएका थिए, आज हामी त्यस्तै अर्को सन्देश दिन उभिएका छौं ।’

नेपालको सन्दर्भमा समृद्धि कुनै काल्पनिक सपना नभएको उल्लेख गर्दै उहाँले हाम्रो जीवनकालमै समृद्धि सम्भव भएको स्पष्ट पार्नुभयो । ‘हामीले ठूलाठूला क्रान्तिहरु गर्यौं, संविधान बनेपछि सबैको सपना थियो कि नेपाल समृद्धिमा पुगोस्,’ उहाँले अगाडि थप्नुभयो, ‘यो कुनै काल्पनिक सपना होइन, नेपाल जस्तो ठाउँ विश्वमा कहिं पनि छैन, नेपालको मानवीय र प्राकृतिक स्रोत सम्पदा हेर्दा यो वास्तविक सपना हो ।’

उहाँले नयाँ शक्ति वैकल्पिक विचारसहितको शक्ति भएको भन्दै देश विदेशमा रहने व्यक्तिहरुको माझ मात्र होइन, संसारले नै नयाँ शक्तिलाई चासोपूर्वक हेरिरहेको बताउनुभयो ।

ओलीको हठले देश विखण्डनतिर जाने आरोप

डा.  भट्टराईले संविधान संशोधन हुन नदिने एमालेको अडानले देश बिखण्डन हुने चेतावनी दिएका छन् । उनले असन्तुष्ट पक्षका मागलाई संविधान संशोधनमार्फत् पूरा गरेर निर्वाचनमा जानुपर्नेमा जोड दिए ।

बाबुराम भट्टराईले एमालेका केपी ओलीतर्फ संकेत गर्दै भने- ‘बुद्ध नेपालमा जन्मिएका हुन् भन्ने तर बुद्धको जन्मस्थानमै बसोबास गर्ने मधेसीहरू विदेशी हुन् भन्ने जस्ता उट्पट्याङ् कुरा गर्नुहुँदैन

नयाँ शक्ति पार्टी रुपन्देहीद्वारा शुक्रबार भैरहवामा आयोजित हिमाल, पहाड मधेस तराई थरुहट एकता अभियानको सभालाई सम्बोधन गर्दै संयोजक भट्टराईले भने, ‘संविधान संशोधन गर्न सकिने दस्तावेज हो । संशोधन गरेर असुन्तष्ट पक्षको मागलाई सम्बोधन गरी देशलाई विकास तर्फ लैजान सकिन्छ तर एमालेले राष्ट्रवादको नारा दिएर संशोधन गर्नैहुन्न भन्ने कसेको अड्डीले देशलाई विखन्डन तर्फ लैजान सक्छ ।’

सभालाई सम्बोधन गर्दै पूर्वप्रधानमन्त्री समेत रहेका भट्टराईले एमालेतर्फ संकेत गर्दै भने, ‘बुद्ध नेपालमा जन्मिएका हुन् भन्ने तर बुद्धको जन्मस्थानमै बसोबास गर्नेहरु मधेसी विदेशी हुन् भन्ने जस्ता उट्पट्याङ् कुरा गर्नु हुँदैन ।

डा. भट्टराईले संविधान संशोधन नगर्दा सीके राउत प्रवृत्ति र पृथकतावादीलाई बल पुग्ने भन्दै संविधान संशोधन गरेर चुनावमा जानुपर्ने बताए

संविधान संशोधन गर्नै नदिने भन्ने एमालेको अडानलाई उनले अलोकतान्त्रिकको संज्ञा दिए । संविधान संशोधन गर्न सकिने दस्तावेज भएको बताउँदै भट्टराईले संविधान संशोधन नगर्दा सीके राउत प्रवृत्ति र पृथकतावादीलाई बल पुग्ने बताए । यसले द्वन्द्व बढ्ने र देश बिखन्डनतर्फ जानसक्ने उनले चेतावनी दिए ।

मधेसी, आदिवासी जनजाति लगायतका मागहरुलाई नजरअन्दाज गर्न नमिल्ने भन्दै भट्टराईले संविधान संशोधन गरी चुनावमा जानुपर्ने धारणा राखे ।

संघीयताविरुद्ध भ्रम फैलाइएको उल्लेख गर्दै उनले संघीयताले देशलाई झनै मजबुत पार्ने दाबी गरे ।