हल्लाको पछि नलागी बुझेर सेयरमा लगानी गर्न धितोपत्र बोर्डको आग्रह

नेपाल धितोपत्र बोर्डले लगानीकर्तालाई सतर्कता अपनाई लगानी गर्न आग्रह गरेको छ । बोर्डले विज्ञप्ति जारी गर्दै लगानीकर्तालाई हल्लाको पछि नलागी सुझबुझ तरिकाले पुँजीबजारमा लगानी गर्न अनुरोध गरेको हो ।

पछिल्लो समय सेयर बजारलाई सकारात्मक असर पार्ने नीतिगत व्यवस्था हुँदाहुँदै पनि परिसूचक अस्थिर बनिरहँदा सञ्चारमाध्यममा आधारहीन समाचार प्रकाशन भएको र त्यस्ता सूचनाले अफवाह फैलाउन खोजेको भन्दै बोर्डले यस्तो आह्वान गरेको हो । बोर्डले धितोपत्र खरिदसम्बन्धी निर्णय लिँदा सम्बन्धित क्षेत्र, उद्योग तथा कम्पनीहरुको अवस्थाको बारेमा आधारभूत र प्राविधिक विश्लेषणसहित जानकारी लिन लगानीकर्तालाई आग्रह गरेको छ । 

वर्तमान पुँजी बजारलाई सुक्ष्म रुपमा अध्ययन गरिरहेको पनि बोर्डले दाबी गरेको छ । सरकारले चालु आर्थिक वर्षको बजेटमा आर्थिक समृद्धिको मार्गचित्र कोर्दै पुँजी बजारमार्फत् देशको आर्थिक समृद्धिमा जोड दिएको बोर्डले बताएको छ । केही वर्षदेखि अन्योलको रुपमा रहेको भ्याटको विवाद समाधान गरी स्थायित्व दिइएकाले लगानीकर्तालाई निर्धक्क लगानी गर्न बोर्डले अपिल गरेको छ । 

यसैगरी पुँजी बजारमा उत्पादनमूलक क्षेत्रलाई प्रोत्साहन गर्न ५० करोड रुपैयाँ वा सोभन्दा बढी चुक्ता पुँजी भएका प्राइभेट लिमिटेड कम्पनीलाई पब्लिक लिमिटेड कम्पनीमा रुपान्तरण हुन चाहेमा ३ वर्षका लागि आयकरमा १० प्रतिशत छुट दिने व्यवस्था गरिएको छ । १ अर्ब वा सो भन्दा बढी पुँजीमा स्थापित भएका उत्पादनमूलक कम्पनीलाई पब्लिक लिमिटेडमा रुपान्तरण हुनुपर्ने व्यवस्था गरिएको छ । यसले बैंक तथा वित्तीय संस्थाको बाहुल्य रहेको धितोपत्र बजारमा क्षेत्रगत जोखिम कम गर्ने प्रयास गरेको बोर्डको बुझाई छ ।

पछिल्लो समय ब्रोकर शुल्कमा कटौती गरी सेयर बजारलाई लगानीमैत्री बनाइएको छ भने वैकल्पिक कोष नियमावलीमार्फत् प्राइभेट इक्युटी, भेन्चर फन्ड र हेज फन्ड प्रवेश गराई कम्पनीहरुलाई चाहिने दीर्घकालिन कोषको व्यवस्था गर्न लागिएको छ । यसका साथै निकट भविष्यमा पूर्ण अनलाइन कारोबार प्रणाली कार्यान्वयनमा ल्याउने प्रक्रिया सुरु भएकोे छ ।

यसरी मुलुकको समग्र आर्थिक अवस्था, सूचीकृत कम्पनीहरुको वित्तीय स्थिति पनि सन्तोषजनक रहेको बोर्डको भनाइ छ । सरकार र बोर्डले धितोपत्रको प्राथमिक र द्वितीय बजारलाई विकास गर्न विभिन्न सुधारका कार्यहरु अघि बढाइएको पनि दावी गरेको छ ।

 

photo

NOC1-250x300