शेरबहादुरकै अगाडि यसरी खनिए रामचन्द्र

५ साउन,काठमाडौं– कांग्रेस नेता रामचन्द्र पौडेलले सभापति शेरबहादुर देउवाको कार्यशैलीको कडा आलोचना गरेका छन् । पार्टीको राजधानीमा आयोजित २ नम्बर प्रदेशको कार्यकर्ता भेलालाई सम्बोधन गर्दै पौडेलले देउवाको कार्यशैलीको कडा आलोचना गरेका हुन् । पार्टी सभापति भएपनि पार्टीलाई गति दिन देउवाले प्रभावकारी कदम चाल्न नसकेको  पौडेलको आरोप छ  । 

सभापति र निकटकाहरुबाटै यसअघिको चुनावमा अन्तरघात भएको आरोप लगाउँदै पौडेलले भने, ‘ म सभापतिलाई भन्न चाहन्छु । पार्टीमा अन्तरघात भएकै हो । यसको जिम्मा लिने कि नलिने  ? मनोपाली प्रबृत्तिले पार्टी चल्दैन ।’ उनले यो कुरा बारम्बार  भित्रि कोठामा पनि भनेको स्मरण गर्दै पौडेलले आज खुलेआम यही कुराको स्मरण गराएको बताए ।  उनले आफू  समावेशी र  समानुपातिको पक्षमा रहेको भएपनि नेतृत्वकै कारण त्यसो हुन नसकेको दाबी गरे । 

 सरुवा बढुवादेखि नियुक्तिसम्ममा देउवाले हस्तक्षेप गरेको तर समावेशीतालाई धज्जी उडाइएको  आरोप लगाउँदै पौडेलले भने, ‘ सभापतिलाई भन्न चाहन्छु, राजदूत नियुक्ति गर्दा आइजईजी नियुक्ति गर्दा के भयो ? यसमा खै समावेशी ? नेतृत्व गम्भीर बन्ने कि नबन्ने  ?’ उनले विगतको चुनावमा टिकट वितरण पनि गुटको आधारमा भएको दाबी गर्दै  तेस्रो चरणको चुनावमा भने क्षमता, योगदान र योग्यताको आधारमा टिकट वितरण हुनुपर्नेमा जोड दिए । 

‘टिकट दिइँदा गुटको आधारमा दिइने रहेछ ।  सिधै केन्द्रमा नेतालाई भनसुन गरेर दिइने रहेछ । तर यो गलत छ ।’ उनले भने, ‘जनताले चिनेको लाई पो टिकट दिने हो । तर यस्तो नहुँदा यसैकारण अन्तरघात भएको हो । यसपटक पार्टी नेतृत्वले यसकुरामा  ध्यान दिनुपर्छ । ’ उनले सँधै आन्दोलनरत मधेसी दललाई पर्खिन नसकिने भन्दै संशोधन प्रस्तावलाई टेबुल गरिनुपर्ने धारणा समेत राखे । 

अन्तरघात गर्ने निष्कासनमा पर्छन्ः देउवा

भेलामा कांग्रेस सभापति शेरबहादुरले  २ नम्बर प्रदेशको चुनाव कांग्रेसको लागि  जीवन मरणको सवाल भएको भन्दै त्यसमा प्रभावकारी ढंगले लाग्न पार्टीपंक्तीलाई निर्देशन दिए । उनले चुनावमा गुटबन्दी गरी अन्तरघात गर्नेलाई ठाउँको ठाउँ कारबाही गरिने चेतावनी दिए ।  उनले भने, ‘पार्टीमा बस्ने  अनि टिकट पाएन भनेर अन्तरघात गर्ने ?   कसैले चुनावमा अन्तरघात गरेको पाइए  ठाउँको ठाउँ कारबाही हुन्छ ।’

उनले आफूकहाँ टिकट माग्दै आउने सबैले चुनाव जुत्छु भन्ने आउने स्मरण गर्दै भने, ‘ जो पनि मलाई भेट्न आउँछन् । म जित्छु भन्छन्, सबैले जित्छ भने कसले हार्छ त ?’ उनले तेस्रो चरणको चुनावमा भनसुनको आधारमा भन्दा पनि योग्य जित्न सक्ने खुबी राख्नेलाई टिकट दिइने भन्दै सोहि अनुसार तयारीमा जुट्न निर्देशन दिए ।  यस्तै उनले राजपाको माग सम्बोधन गर्ने गरी सरकार लागिपरिराखेको पनि सो क्रममा बताए । यस्तै भेलामा महामन्त्री शशांक कोइराला र नेता कृष्ण सिटौलाले अन्तरघातले पार्टी पछि गरेको  भन्दै यसलाई गम्भीर रुपमा लिइनुपर्ने बताए । 

यसअघि नेता विमलेन्द्र निधिले २ नम्बर प्रदेशमा पार्टीले १०० सिट जित्ने लक्ष्य प्रस्तुत गरेका थिए  ।  भेलामा प्रदेश नं २ का केन्द्रीय सदस्य, जिल्ला सभापति, सांसद, पूर्वसांसद, जिल्ला सभापतिका निकटतम प्रतिस्पर्धी, क्षेत्रीय सभापति र संविधानसभा सदस्य निर्वाचन २०७० का प्रत्यक्षतर्फका उम्मेदवारका प्रत्यासी सहभागी छन् । 

 

photo

NOC1-250x300