७ चैत, काठमाडौं । आजदेखि काभ्रेपलाञ्चोकको पाँचखालमा अन्तर्राराष्ट्रिय सैन्य अभ्यास सुरु हुँदैछ । सैन्य अभ्यासका लागि नेपाली सेनाको वीरेन्द्र शान्ति कार्य तालिम केन्द्र पाँचखालमा २८ मुलुकका एक हजार २४ सेना सहभागी हुँदैछन् ।
सैन्य अभ्यासमा नेपाल, बंगलादेश, बोस्निया हर्जगोभिना, कम्बोडिया, घाना, इन्डोनेसिया, जोर्डन, काजकिस्तान, मलेसिया, मंगोलिया, मेक्सिको, पाराग्वे, फिलिपिन्स, पाकिस्तान र रुवान्डाका सेना सहभागी हुनेछन् ।
त्यस्तै श्रीलंका, किर्गिस्तान, थाइल्यान्ड, अमेरिका, उरुग्वे, भियतनाम, अस्टे्रलिया, क्यानडा, भारत, जापान, न्युजिल्यान्ड, दक्षिण कोरिया र बेलायतका सेनाले सैन्य अभ्यास गर्नेछन् ।
नेपाली सेना र अमेरिकी सेनाको एसिया प्यासिफिक कमान्डको संयुक्तले गर्न लागेको सैन्य अभ्यासको प्रधानमन्त्री पुष्पकमल दाहालले उद्घाटन गर्ने कार्यक्रम छ ।
नेपालमा तेस्रो पटक हुन लागेको सैन्य अभ्यासका लागि नेपाली सेनाले ४९ जना सैन्य प्रशिक्षक तयार पारिएको जनाइएको छ । यसअघि सन् २००० र २०१३मा यस्तै सैन्य अभ्यास भएको थियो ।
सैन्य अभ्यासकै लागि अमेरिकी सेना प्रमुख नेपाल आएका छन् । बहुपक्षीय सैन्य अभ्यास चैत २१ गते सकिनेछ ।
