people Nepal » पाकिस्तानमा बम विस्फोटबाट ११ जनाको मृत्यु पाकिस्तानमा बम विस्फोटबाट ११ जनाको मृत्यु – people Nepal

पाकिस्तानमा बम विस्फोटबाट ११ जनाको मृत्यु

Pakistan-bomb-blast

९ असार, क्वेटा (पाकिस्तान) । पाकिस्तानको दक्षिणपश्चिमी सहर क्वेटामा शुक्रबार भएको एक विस्फोटमा परीमा कम्तीमा ११ व्यक्तिको मृत्यु भएको छ ।

साथै सो बिस्फोटबाट २० जना घाइते भएका छन् । सो समाचार सरकारी अधिकारीहरुले शुक्रबार दिएका छन् ।

बलुचिस्तान प्रान्तको प्रान्तीय राजधानी क्वेटा सरहमा रहेको प्रहरीको प्रमुख कार्यलय अगाडि सो विस्फोट भएको जनाइएको छ । यस आक्रमणमा मारिनेहरुमा चार प्रहरी अधिकारी पनि रहेका छन् ।

बलुचिस्तान प्रान्तमा पृथकतावादी र इस्लामिक आतङ्ककारी समूहको बलियो प्रभाव रहेको पाइन्छ । विस्फोट भएको इलाकाबाट ११ व्यक्तिको शव ल्याइएको नागरिक अस्पतालका प्रमुख फारेद अहमदले एएफपी समाचार समितिलाई बताउनु भएको छ ।

यस विस्फोटमा परी घाइते भएका २० मध्ये ३ जनाको अवस्था गम्भीर भएको जनाइएको छ । शुक्रबार विहान सवेरै दिइएको जानकारी अनुसार यस आक्रमणमा पाँच व्यक्तिको मृत्यु भएको थियो ।

केही समयपछि यो सङ्ख्या बढेर ११ पुगेको जनाइएको छ । घाइतेहरुमध्ये केहीको अवस्था चिन्ताजनक भएको हुनाले मृतकको सङ्ख्या बढ्न पनि सक्ने अनुमान गरिएको छ ।

यस विस्फोटको जिम्मेवारी कसैले लिएको छैन । प्रहरीले विस्फोट गराउने व्यक्तिको खोजी गरिरहेको जनाएको छ । रासस/एएफपी