देउवाको आरोप : ओली सरकार अधिनायकवादको बाटोमा हिँड्यो

नेपाली कांग्रेसका सभापति शेरबहादुर देउवाले वर्तमान सरकार अधिनायकवादको बाटोमा हिँडेको आरोप लगाएका छन् ।

नेकपाको केपी शर्मा ओली सरकारले जनताको अधिकार खोसेर अधिनायकवादको बाटोमा अगाडि बढेको बताए ।

शनिवार रुपन्देहीको तिलोत्तमा पुगेका सभापति देउवाले प्रेस स्वतन्त्रता तथा मानवअधिकारमाथि नै प्रहार गरेर लोकतन्त्रलाई कमजोर बनाउन खोजेको बताएका हुन् । दुईतिहाइको बलमा जनताको अधिकार खोसेर लोकतन्त्रको मूल्य र मर्ममाथि नै प्रहार गर्ने गरी विभिन्न विधेयक ल्याएको भन्दै उनले कम्युनिस्ट सरकारको अधिनायकवादविरुद्ध प्रजातान्त्रिक शक्ति एक भएर अगाडि बढ्नुपर्नेमा जोड दिए ।

पूर्व प्रधानमन्त्री समेत रहेका देउवाले अभिव्यक्ति स्वतन्त्रता हनन् हुने गरी ल्याइएको मिडिया काउन्सिल विधेयकविरुद्ध पत्रकारको आन्दोलनमा नेपाली कांग्रेसको पूर्ण साथ र समर्थन रहेको बताए । प्रेस स्वतन्त्रतामाथि आँच आउन नदिन सदनमार्फत कांग्रेसले निरन्तर खबरदारी गरिरहेको भन्दै देउवाले पत्रकारको जायज मागको सम्बोधन गर्नुपर्नेमा जोड दिए ।

नेपाली कांग्रेस प्रदेश ५ संसदीय दलका नेता स्व. बलदेव शर्मा पोखरेलको १३ औं दिनको पुण्यतिथिमा तिलोत्तमामा भएको श्रद्धाञ्जलि सभालाई सम्बोधन गर्दै देउवाले पोखरेल जस्ता निष्ठावान नेता कार्यकर्तालाई पार्टीले कुनै न कुनै रुपमा स्थान तथा सम्मान दिँदै जाने बताए ।

नेपाली कांग्रेस रुपन्देहीद्वारा आयोजित शोक सभामा पार्टीका महामन्त्री शशांक कोइरालाले स्व. नेता पोखरेलले देखाएको निष्ठा र त्यागको राजनीतिलाई सबैले अनुसरण गर्न सके सच्चा श्रद्धाञ्जलि हुने बताए । कांग्रेस संसदीय दलका प्रमुख सचेतक बालकृष्ण खाँणले कम्युनिस्ट सरकारले अहिलेसम्म अन्तरमनबाट लोकतान्त्रिक संविधानलाई नै स्वीकार गर्न नसकेको बताए ।

दुईतिहाइको बलमा आफ्ना नेता कार्यकर्तालाई बलियो बनाउने काममा मात्रै सरकार लागेको भन्दै नेता खाँणले जनताको हितमा कुनै पनि काम गर्न नसकेको बताए । जीवनको अन्तिम क्षणसम्म पनि देश र जनताका लागि लोकतन्त्र र प्रजातन्त्रलाई बलियो बनाउनुपर्छ भनेर लागिरहने स्व. नेता पाखेरेलको निधनले पार्टीलाई ठूलो क्षति पुगेको उनले बताए ।

 

photo

NOC1-250x300