नेपाल आयल निगमले खाना पकाउने ग्यासको मूल्य बढाएको छ। निगमले प्रति सिलिन्डरमा २५ रुपैयाँले बढाएको प्रवक्ता भानु खनालले जानकारी दिए। 
यसअघि १ हजार ३ सय २५ रुपैयाँ रहेको एक सिलिन्डरको मूल्य अब १ हजार ३ सय ५० रुपैयाँ पुगेको छ।
भारतबाट मूल्य बढेर आएको भन्दै निगमले ग्यासको मूल्य बढाएपनि अन्य पेट्रोलियम पदार्थको मूल्य भने यथावत राखेको जानकारी दिएको छ।
एक सिलिन्डर ग्यासमा यसअघि निगमलाई ७८ रुपैयाँ घाटा भएकोमा मूल्य बढाउँदा पनि सो घाटा बढेर १ सय २३ रुपैयाँ पुगेको निगमले जनाएको छ।
मूल्य समायोजन नगर्दा गएको साउनदेखि नाफामा गएको निगम गएको महिनादेखि घाटामा गएको थियो। गएको १५ दिनमा १४ करोड घाटा बेहोरेको निगमले आगमी १५ दिनमा २३ करोड ९३ लाख घाटा हुने प्रक्षेपन गरेको प्रवक्ता खनालले जानकारी दिए।
भारतीय आयल कर्पोरेशन (आइओसी )ले प्रत्येक अंग्रेजी महिनाको १ र १५ तारीकमा निगमलाई नयाँ मूल्य सूची पठाउँछ।
आइओसी मूल्य बढाएर पठाएपनि त्यही अनुसार नेपालमा मूल्य समायोजन नहुँदा घाटा प्रत्येक महिना बढ्दै गएको निगमका अधिकारीहरुले जनाएका छन्।
