एमालेको मेची महाकाली अभियानः कसको घरमा कुन नेता बसे

फागुन २१  |  झापा –नेकपा एमालेको आजदेखि झापाको काँकट भित्ताबाट औपचारिक शुरुवात भएको भनिएको मेची महाकाली राष्ट्रिय अभियानमा नेताहरु सम्बन्धित क्षेत्रमा कार्यकर्ताको घरमा बास बसेका छन्, भने केही नेता आफ्नै घरमा पनि बसेका छन् । गृह जिल्ला आएका एमाले अध्यक्ष केपि ओली आफ्नै घरमा बास बसेका छन् । उनको घर झापाको दमक नपा १० मा ढाइ तले घर छ ।

२० गते नै झापा पुगेका एमाले नेताहरु कार्यकर्ताको घरदेखि होटलमा बास बसेका छन् । ओली दुईदिन नै आफ्नो घरमा बास बसेका हुन् ।
एमालेका बरिष्ठ नेता झलनाथ खनाल झापा बसाईको पहिलो दिन झापाका कार्यकर्ता श्रीप्रसाद मैनालीको घरमा बास बसेका थिए । उनीसंग भएका जम्मा चौध जनाको टोली एउटै घरमा बास बसेको उनका स्वकीय सचिव कृष्ण भट्राईले जानकारी दिए । दोस्रो दिनको बास खनालको पहिला इलाम घर भएका हाल झापामा बस्दै आएका विष्णु खतिवडाको घरमा हुने छ । यसले कार्यकर्तामा राम्रो सन्देश गएको कार्यकर्ताहरु बताउँछन् ।

पूर्व प्रधानमन्त्री तथा एमालेका नेता माधव कुमार नेपाल पनि होटल नबसेर कार्यकर्ताका घरमा बास बसेका छन् । पहिलो दिनको बास उनको दमकको गेष्ट हाउसमा भएको थियो । दोस्रो दिनको बास भने एकजना कार्यकर्ताको घरमा बस्ने उनका स्वकीय सचिव नितेश पौडेलले बताए ।
उपाध्यक्ष बामदेव गौतम भने दुबै दिन झापाको बिर्तामोडमा रहेको होलिडे होटलमा बसेका छन् । सबै नेताहरु कार्यकर्ताको घरमा गएर बस्दा गौतम होटलमा बस्नुको कारण भने पार्टीले नै उनलाई होटलमा बस्न भनेको जानकारी उनका सचिवालयले दियो । उनीसंग ११ जनाको टोली रहेको छ ।

अर्का उपाध्यक्ष भीम रावल पनि कार्यकर्ताको घरमा बसेका छन् । उनको बास दमक ११का एमाले कार्यकर्ता नन्दी अधिकारीको घरमा भएको छ ।
महासचिव इश्वर पोख्रेलको बासपनि दमक ११मा रहेको एमाले कायकर्ता भगवान बस्नेतको घरमा भएको छ । सचिव गोकर्ण विष्टको बास पनि एमाले जिल्ला कमिटी सदस्य केन्द्र प्रसाईको घरमा भएको छ । प्रचार विभाग प्रमुख तथा सचिव योगेश भट्राई आफ्नी बहिनी सुस्मा पौडेलको घरमा बसेका छन् ।

कार्यकर्ताहरु अहिले नेताहरुलाई आफ्नो घरमा बस्न अनुरोध गरेपनि जिल्ला पार्टीले जसको घरमा बस्न भन्यो त्यसको घरमा बस्नु पर्ने नियम बनाएको छ । त्यहि अनुसार नेताहरु बास बस्ने गरेको जिल्ला कमिटि सदस्यले बताए ।
अभियानमा आएका एमालेका युवा स्वयंसेवकहरु लगायत करिब एक हजार नेताकार्यकर्ताहरु जनताको घर घरमा बास बसेका छन् । यी नेता कार्यकर्ताहरुलाई पहिलो दिन काँकड्भिट्टाका विभिन्न होटलमा बास बसेका थिए ।

 

photo

NOC1-250x300