अस्पतालको पार्किङबाटै बाइक गायब भएपछि …

गंगाजमुना गाउँपालिका–६ धादिङका बाबुराम कार्की बुवा बिरामी भएर उपचारका लागि महारागञ्जको टिचिङ अस्पताल आएका थिए । उपचारका लागि रगत जम्मा गर्नुपर्ने थियो । उनी त्यसैका लागि दौडधुपमा थिए ।

Traffice_Bike_cover_DO3PrOqAS1

मंसिर १९ गते दिउँसो अपरेशनको लागि अन्य सामानहरू जुटाइसकेका थिए, रगत मात्र बाँकी थियो ।

बेलुका ६ बजे अन्य सामानहरू जुटाइसकेपछि अस्पतालमा बुबालाई खाना लिएर गए । उनले बाइक टिचिङ अस्पतालको पार्किङस्थलमा पार्किङ गरेका थिए । उनी रगत लिनको लागि रेडक्रसको बल्ड बैंकमा जानुपर्ने थियो । उनी हतार–हतार निस्किए तर पार्किङ गरेर राखेको ठाउँमा बाइक थिएन । उनले चारैतिर बाइक खोजे तर कतै भेटेनन् । उनी अत्तालिए, आपतकालीन अवस्थामा बाइक पाएनन् । रगत लिन जान पाएनन् उनले । बा६७प ७१९६ नम्बरको बाइक आधा घण्टाको बीचमा चोरी भइसकेको थियो ।

बाबुरामले ट्राफिक प्रहरी महाशाखाको कन्ट्रोल १०३ नम्बरमा फोन गरे । आफ्नो बाइक हराएको भनेर टिपाए ।

एक महिनापछि उनको बाइक ट्राफिक प्रहरीको सादापोसााकका प्रहरीले भक्तपुरको गठ्ठाघरमा फेला पार्‍यो । 

यस्तै, कालिमाटीका मोदनाथ सिलवाले पुष १७ गते बेलुका ६ बजे अफिसबाट फर्किएपछि आफ्नो बा७७प ८८६८ नम्वरको २२० सीसीको मोटरसाइकल पार्किङको लागि राखेका थिए ।

आधा घण्टापछि फर्किँदा उनको मोटरसाइकल थिएन । उनले यताउता खोजे तर भेट्टाएनन् । उनले तत्कालै ट्राफिक प्रहरीलाई खवरे गरे । प्रहरीले तत्कालै एक्सन लियो । तीव्र गतिमा खोजी कार्यलाई अघि बढायो । तीन दिनपछि कालिमाटीको एउटा कुनामा पार्किङ गरेको अवस्थामा फेला पर्‍यो ।

आइतवार हराएका बाइक महानगरीय ट्राफिक प्रहरीले सवारीधनीलाई बुझायो । सवारी धनी बाबुराम र मोदनाथले आफ्नो बाइक कसरी हरायो भनेर सुनाए ।

ट्राफिक प्रहरी आइतवार उपत्यकाका अनामनगर, ताल्छिखेल, पशुपति, बागडोल, टेकु, टिचिङ अस्पताल, झम्सिखेल, बसुन्धारा, मंगलबजार, ठमेल, लैनचौर लगायतका क्षेत्रबाट प्रहरीले विभिन्न मोटरसाइकल फेला पारि सम्बन्धितसवारी धनीलाई बुझाएको छ ।

‘हामीले उजुरीका आधारमा खोजी गरेर सम्बन्धित धनीलाई बुझाएका हौं । यदि तपाईंहरूको बाइक हरायो भने प्रहरीमा खबर गर्न नभुल्नुहोला,’ महानगरीय ट्राफिक प्रहरी महाशाखाका प्रमुख वरिष्ठ प्रहरी उपरीक्षक भिमदत्त ढकालले सवारी धनी मोटरसाइकल हस्तान्तरण गर्दै भने ।

४ महिनामा हराए ५ सय ५४ मोटरसाइकल

महानगरीय ट्राफिक प्रहरी महाशाखामा पछिल्लो ४ महिनामा ५ सय ५४ वटा मोटरसाइकल चोरीको उजुरी परेका छन् । यो चालू आर्थिक वर्ष २०७६/०७७ को अघिल्लो ४ महिनाको तथ्यांक हो ।

यसमध्ये १ सय ४७ वटा मोटरसाइकल चोरीसम्बन्धी उजुरीलाई प्रहरीले अनुसन्धानमा अघि बढाएको छ ।

पछिल्लो ४ महिनाको अवधिमा १ सय ३७ वटा मोटरसाइकल भेटेर धनीलाई बुझाएका प्रमुख एसएसपी ढकालले लोकान्तरलाई जानकारी दिए ।

‘यसबीचमा १४ वटा मोटरसाइकलसहित २८ जना चोरलाई कारवाहीका लागि पठाएका छौं,’ ढकालले भने ।

चोरीको घटना बढेकोबढ्यै 

मोटरसाइकल चोरीको समस्या बर्सेनि बढ्दै गएको महानगरीय ट्राफिक प्रहरी महाशाखाको तथ्यांकले देखाएको छ ।

आर्थिक वर्ष २०७४/०७५ मा १ हजार ३ सय ८२ मोटरसाइकल हराएका उजुरी महाशाखामा परेका थिए । जसमध्ये ३ सय ७६ मोटरसाइकल अनुसन्धानको दायरामा ल्याएको थियो भने २ सय ५१ मोटरसाइकल खोजेर सवारी धनीलाई जिम्मा लगाएको थियो ।

आर्थिक वर्ष २०७५;०७६ मा १ हजार ६ सय ११ मोटरसाइकल हराएको उजुरी परेका थिए, जसमध्ये ३ सय ६५ मोटरसाइकल अनुसन्धानको दायरामा ल्याएको थियो । १ सय ८९ मोटरसाइकल सवारी धनीलाई जिम्मा लगाएको प्रहरीको तथ्यांक छ ।

 

photo

NOC1-250x300