गृहमन्त्री रामबहादुर थापाले केन्द्रीय कारागारमा रहेका कुख्यात अपराधी चार्ल्स शोभराज र डिल्ली बजार जेलमा रहेका पूर्व सांसद बालकृष्ण ढुङ्गेलसँग भेटेका छन्।
थापा मंगलबार विहान सुन्धारास्थित केन्द्रीय कारागार, भद्रगोल जेल र महिला कारागर पुगेका थिए। त्यहाँको भ्रमण सकेर थापा डिल्लीबजारस्थित सदरखोर कारागार पुगेका थिए।
केन्द्रीय कारागार भ्रमणको क्रममा उनले त्यहाँको गोलघरमा रहेका कुख्यात अपराधी चार्ल्स शोभराज र पूर्व माओवादी नेता पुष्कर गौतमलाई भेटे।
शोभराजसँग जेल निरीक्षणको क्रममा भेट भएकाले गृहमन्त्री थापाको खासै कुराकानी भएन। तर, गौतमसँग भने केही समय उनले कुराकानी गरेका थिए।
द्वन्द्वकालमै माओवादी परित्याग गरेका गौतम ओखलढुङ्गाका उज्वनकुमार श्रेष्ठको हत्या अभियोगमा बिगत ४ बर्षदेखि जेल जीवन बिताइरहेका छन्।
द्वन्द्वकालीन घटना भएपनि आफूलाई पक्राउ गरी जेलमा राखिएकोमा गुनासो गर्दै गौतमले पार्टीले समेत छुटाउन पहल नगरेकोमा गुनासो गरेका थिए।
‘छुटाउने पहल होला भन्दाभन्दै ४ बर्ष बितिसक्यो, तर कुनै पहल भएजस्तो लागेन’ निराशा व्यक्त गर्दै गौतमले भनेका थिए, ‘अब त आसै मरिसकेको छ।’
जवाफमा गृहमन्त्री थापाले द्वन्द्वकालीन घटना बृहद शान्ति सम्झौताको विषय भएको बताउँदै त्यसै अनुरुप छुटाउन पहल गरिने आश्वासन दिए।
केन्द्रीय कारागारको निरीक्षणपछि गृहमन्त्री थापा डिल्लीबजारस्थित सदरखोर कारागार पुगे। माओवादी नेता ढुङ्गेललाई पनि त्यहीँ राखिएको छ।
ढुङ्गेलले सोही जेलमा आफू लगायत १५–१६ जना राजनीतिक प्रकृतिका बन्दीहरु रहेको जानकारी दिँदै रिहाईको पहल गर्न आग्रह गरेका थिए।
गृहमन्त्री थापाका प्रेस संयोजक किरण भट्टराईका अनुसार, ढुङ्गेलले गृहमन्त्री थापासँग एमाले–माओवादी केन्द्रबीचको एकतालाई छिटो टुङ्गोमा पुर्याउन आग्रह गरेका थिए।
