एमाले-माअाेवादीबीच पार्टी एकीकरणकाे अन्तिम मिति पर्खाइ भइरहेका बेला माओवादी केन्द्रका अध्यक्ष पुष्पकमल दाहालले एमाले–माओवादी एकता बराबरी हैसयितमा मात्र हुन सक्ने बताएका छन्। अखिल क्रान्तिकारीको अगुवा कार्यकर्ता प्रशिक्षण समापन गर्दै उनले संगठनमा बराबरी भगबण्डा हुनुपर्ने बताए।
प्रतिनिधि सभा तथा प्रदेश सभा निर्वाचनमा दुइ पार्टीबीच ६०/४० को भागबण्डा भएको स्मरण गर्दै उनले भने, ‘बाहिर भनिएजस्तो एमालेबाट २०० र माओवादीबाट ९९ जना लिएर केन्द्रीय कमिटी बनाउने होइन। बराबरीबाहेक पार्टी एकता हुँदैन।’ एकीकृत पार्टीको महाधिवेशन नभएसम्म आलोपालो अध्यक्ष हुने उनले बताए। पार्टी एकताको कार्यविधि नटुंगिएको र त्यसमा समय लाग्ने भन्दै उनले वैशाख १० गते पार्टी एकता हुन नसक्ने जनाए।
‘हतारमा एकता गरेर फुर्सदमा पछुताउनुभन्दा सबै कुरा मिलेपछि मात्र एकता गर्नुपर्छ’, दाहालले भने। एकीकृत पाटीृको कार्यदिशा समाजवादी रणनीतिमा आधारित हुने उनले बताए।
अध्यक्ष प्रचण्डले अब कुनै देशको नक्कल नभई नेपालको आफ्नै मौलिकतामा समाजवादी क्रान्ति हुने बताउनु भयो । ‘नेपालमा हाम्रै तरीकाले समाजवाद ल्याउनुपर्छ,’ उनले भने, ‘शान्तिपूर्ण तरीकाले राज्यमा हस्तक्षेप गरेर समाजवादको आधार निर्माण गर्ने गरी अगाडि बढ्ने समझदारीमा पुगेका छौं।’
‘आजको राजनीतिक परिवर्तन माओवादी आन्दोलन र विचारका कारण मात्रै भएको हो, अरुको सहायक भूमिका छ’ उनले भने, ‘एमालेको संसदीय संघर्षले पनि परिवर्तनको आन्दोलनमा सकारात्मक भूमिका निर्वाह गरेको छ।’
