प्रधानमन्त्री ओली र अध्यक्ष दाहालको वार्तापछि कार्यदलको बैठक

काठमाडौँ, १० फागुन  :  मन्त्रिमण्डल विस्तार र पार्टी एकता प्रक्रियाबारे नेकपा (एमाले)का अध्यक्ष एवं प्रधानमन्त्री केपी शर्मा ओली र नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’बीच वार्ता र बैठक भइरहेको छ ।प्रधानमन्त्री निवास बालुवाटारमा उनीहरुबीच भेटवार्ता सकिएको र अहिले  दुई दलको संगठन तथा राजनीतिसम्बन्धी कार्यदलको बैठक बसिरहेको  प्रधानमन्त्रीका प्रेस संयोजक चेतन अधिकारीले जानकारी दिए । नेकपा(एमाले) र नेकपा (माओवादी केन्द्र) ले पार्टी एकताका सम्बन्धमा आवश्यक दस्तावेज तयार गर्न गठन गरेको विधान मस्यौदा तथा संगठनात्मक कार्यदल र प्रतिवेदन मस्यौदा कार्यदलको संयुक्त बैठक प्रधानमन्त्री निवास बालुवाटारमा सुरु भएको हो।  

कूल दलले कुन कुन र कति मन्त्रालय लिने भन्ने विषयमा उहाँहरुबीचको छलफलले निष्कर्ष निकालेमा सम्भवतः फागुन १० गते आजै मन्त्रिमण्डल विस्तार हुनेछ ।यही फागुन ३ गते नयाँ सरकार गठन भएपनि हाल मन्त्रिमण्डलमा प्रधानमन्त्रीबाहेक एमालेका दुई सदस्यमात्र छन् । माओवादी केन्द्रले पार्टी एकता प्रक्रियाले मूर्तरुप लिएपछि आफू सरकारमा जाने भनेपछि यही फागुन ७ गते पार्टी एकताको सातबुँदे प्रारम्भिक आधारमा सहमति भएको थियो ।