काठमाडौं, ५ चैत । संयुक्त राज्य अमेरिकाले पूर्वप्रधानमन्त्री एवम् नेकपाका अध्यक्ष पुष्पकमल दाहाल ‘प्रचण्ड’ का लागि ‘नो इन्भेष्टिगेशन’ सर्कुलर जारी गरेको छ । अध्यक्ष प्रचण्ड अमेरिका भ्रमणमा निस्किएलगत्तै ‘नो इन्भेष्टिगेशन’ सर्कुलर जारी गरेको हो ।
अध्यक्ष दाहालका लागि जारी गरिएको उक्त सर्कुलर अमेरिकाले विशेषरुपमा मात्र जारी गर्दछ । अमेरिकाले यसअघि भारतीय प्रधानमन्त्री नरेन्द्र मोदी र कांग्रेस आईकी नेतृ सोनिया गान्धी लगायतका भारतीय उच्च नेतृत्वहरुका लागि पनि यस्तो सर्कुलर जारी गरेको थियो । अमेरिकाले जारी गर्ने यो सर्कुलरले कुनै पनि उच्च नेताहरुका लागि उत्पन्न हुनसक्ने कानूनी झमेला हटाउनका लागि बाटो खोल्ने गर्दछ ।
अध्यक्ष प्रचण्ड अमेरिका भ्रमणमा निस्किनुअघि नेपालका लागि अमेरिकी राजदूत रेन्डीबेरीले अध्यक्ष प्रचण्डको निवासमै पुगेर भेटवार्ता गरेका थिए । भेटवार्तामा प्रचण्डको अमेरिका भ्रमण र त्यहाँ हुने सम्मानका विषयमा छलफल भएको बताइएको छ । अध्यक्ष प्रचण्ड पत्नी सीता दाहालको उपचारका लागि अमेरिका पुगेका छन् ।