पहिलो खेलमा नेपाल बंगलादेशसँग ६–० ले पराजित

साफ यू–१५ महिला फुटबल च्याम्पियनसिपको पहिलो खेलमा नेपाल पराजित भएको छ  । आइतबार भएको पहिलो खेलमा नेपाल आयोजक बंगलादेशसँग ६–० ले पराजित भएको हो ।

ढाकास्थित वीरश्रेष्ठ सहिद सिपाही मोहम्मद मोस्ताफा कमल स्टेडियममा बंगलादेशविरुद्ध नेपाली निरिह देखियो  । नेपालले पहिलो हाफमै चार गोल खाएको थियो । दोस्रो हाफमा नेपालले दुई गोल खाएको थियो  । 

नेपालमाथि एकतर्फी जित निकाल्ने क्रममा बंगलादेशकी तोहुरा खातुनले ह्याट्रिक गरिन् । त्यस्तै अनुचिङ मोगिनीले दुई तथा मोनिका चक्माले एक गोल गरिन् । जितसँगै बंगलादेशले ३ अंक जोडेको छ । यो जितसँगै बंगलादेशले फाइनल चरणमा पुग्ने सम्भावना बलियो बनाएको छ ।

यता, पहिलो खेलमा पराजित भएसँगै फाइनल चरण पुग्ने नेपालको लक्ष्यमा धक्का लागेको छ । अब नेपालले दोस्रो खेलमा मंगलबार भारतसँग खेल्नेछ । त्यस्तै नेपालले अन्तिम खेलमा भुटानसँग शुक्रबार प्रतिस्पर्धा गर्नेछ ।

आइतबार नै भएको च्याम्पियनसिपको उद्घाटन खेलमा भारतले जित निकालेको छ । भारतले भुटानलाई ३–० ले पराजित गर्दै विजय सुरुवात गरेको हो  । 

दक्षिण एसियाका चार राष्ट्र सहभागी च्याम्पियनसिपमा नेपालसहित आयोजक बंगलादेश, भारत र भुटान रहेका छन् । राउण्ड रोबिन लिगका आधारमा हुने च्याम्पियनसिपको शिर्ष दुई टोलिले उपाधिका लागि खेल्नेछन् । फाइनल खेल पुस ९ गते हुनेछ ।