‘नाकाबन्दीका सुत्रधार’ अजित डोभलसँग प्रचण्डकाे भेट

नेपाल कम्युनिष्ट पार्टी (नेकपा)का अध्यक्ष प्रचण्डसँग भारतीय राष्ट्रिय सल्लाहकार अजित डोभलसँग बिहीवार भेट गरेका छन्। भेटमा दुई पक्षीय सम्बन्धका बिषयमा छलफल भएको थियो। संविधानसभाबाट संविधान जारी गरेपछि असन्तुष्ट बनेको भारतले नेपालमाथि ६ महिना लामो नाकाबन्दी लगाएको थियो।

उक्त नाकाबन्दीका सुत्राधारका रुपमा डोभललाई लिइन्छ।  तीन दिने भारत भ्रमणका क्रममा दिल्ली पुगेका दाहालले र डोभलबीचको भेटवार्तालाई महत्वकासाथ हेरिएको छ।  प्रचण्डको सचिवालयले भने प्रचण्ड र डोभलबीचको भेटवार्तामा दुई देशका बीचमा बढ्दै गएको सम्बन्ध र हार्दिकता सुदृढ गर्ने र दुई देशबीच पछिल्लो चरणमा भएका सहमति  र समझदारीहरुलाई छिटोभन्दा छिटो तालिका अनुसार कार्यान्वयनमा लैजाने बिषयमा छलफल भएको जनाएको छ।

भारत भ्रमणको दोस्रो दिन प्रचण्डले नयाँ दिल्लीमा रहेका प्रवासी नेपालीसँग छलफल गर्दै नेपाल भारतबीचको सम्बन्धलाई थप बलियो बनाउन आफूले भारतको भ्रमण गरेको बताएका थिए। 

‘सरकारले अगाडि सारेको विकास योजनाको पक्षमा वातावरण बनाउन, नेपाल भारतबीच भएका सम्झौताहरु कार्यान्वयन गराउन र नेपाल भारतबीचको सम्बन्धलाई थप बलियो बनाउने भारत भ्रमणको उद्देश्य हो,’ उनले भने।

उनले हाल दुई देशका बीचको सम्बन्धमा सकारात्मक विकास भएको दाबी गरे। उनले बदलिएको परिस्थितिमा नेपाली कार्यवहाक राजदूत र कर्मचारीलाई अझ सक्रियतापूर्वक र गम्भीरतापूर्वक कार्यसम्पादन गर्न आग्रह गरे।