तपाईले गर्दा सिंगो सरकारको बद्नामी हुन लाग्यो : प्रधानमन्त्री ओली

काठमाडौँ महानगरपालिकाका मेयर विद्यासुन्दर शाक्यसँग प्रधानमन्त्री केपी शर्मा ओली असन्तुष्ट बनेका छन् । काठमाडौँ महानगरको दुरावस्था देखेर दिक्क भएका प्रधानमन्त्री ओलीले प्रतिपक्षीको पनि बचन सहनु परेकाले मेयरको काम देखेर दिक्क भएका हुन् ।

मेयर शाक्यलाई समग्र काठमाडौँको विकासमा केन्द्रीत हुन र नतिजा देखिने गरी काम गर्न निर्देशन दिएका छन् । मेयर शाक्यलाई काठमाडौँमा भएको प्रगति विवरण पेश गर्न पनि निर्देशन दिएका थिए । लगातारमा विवादमा तानिदैं आएका मेयर शाक्य काठमाडौँ नगरवासीले पनि असक्षम घोषणा गर्दै आएका छन् ।

महानगरको काम राम्रो गर्न नसक्दा सिंगो सरकारको बद्नामी हुन लागेको भन्दै ओलीले शाक्यलाई देखिने गरी काम गर्न निर्देशन दिएका छन् । ओलीले शाक्यलाई प्रधानमन्त्री निवास वालुवाटरमै बोलाएर एक वर्षमा काठमाडौं महानगरपालिकाले गरेको कामको विवरण मागेका थिए ।

सडकको दूरावस्था र धुँवाधूलो नियन्त्रण गर्नेतर्फ परिणामुखी काम हुन नसकेकोमा प्रधानमन्त्री असन्तुष्ट छन् । शाक्यका कामप्रति असन्तुष्टि जनाउँदै सुधारका साथ अघि बढ्न ओलीले निर्देशन दिएका छन्  ।

शाक्यले भने काम गर्न खोज्दा विभिन्न ठाउँबाट अवरोध आइरहेको र नभएका कामको मात्र प्रचार हुने गरेको स्पष्टिकरण दिएका छन् । केन्द्र सरकार र प्रदेश सरकारले गर्नुपर्ने काम नभएको दोष पनि आफूले बोक्नु परेको मेयर शाक्यको गुनासो छ ।

शाक्यले आफ्नो विरोध र आलोचना काठमाडौँका स्थानीय वासिन्दाभन्दा पनि बाहिरबाट आएर बसेकाहरुले सामाजिक सञ्जालबाट गर्ने गरको बताउँदै आएका छन् ।

महानगरको जिम्मेवारीमा नपर्ने राष्ट्रिय सडकहरुको दूरावस्थाको जिम्मेवार पनि आफूलाई देखाउने गरिएको गुनासो शाक्यको छ । सडकको धूलो सफा गर्न दुई वटा बुमर ल्याइइएको उनले बताए ।