जोरा र पारसको आक्रामक ब्याटिङ, युएईलाई १ सय ५ रनको लक्ष्य

माघ २०,दुबई : जारी युएई विरुद्धको तेस्रो तथा निर्णायक टि-२० अन्तर्राष्ट्रिय खेलमा नेपालले पहिले ब्याटिङ गर्दै निर्धारित १० ओभरमा ८ विकेटको क्षतिमा १ सय ४ रन जोडेको छ । वर्षाले खेल ढिलो सुरु भएको कारण खेललाई १० ओभरमा छोट्याइएको थियो ।

पहिले ब्याटिङको निम्तो पाएको नेपालका लागि पवन सर्राफ र कप्तान पारस खड्का ओपनिङमा आएका थिए । तर पहिलो ओभरको तेस्रो बलमा कुनै रन नजोडी पवन पभेलियन फर्के भने सो ओभरमा नेपालले कुनै रन जोड्न सकेन ।

तेस्रो नम्बरमा ब्याटिङ गर्न आएका ज्ञानेन्द्र मल्ल ९ बलमा ११ रन जोड्दै तेस्रो ओभरमा बोल्ड आउट हुन पुगे । लगत्तै चौथो ओभरमा दोस्रो टी-२० खेलका नायक दीपेन्द्र सिंह ऐरी २ रन जोड्दै आउट भएसँगै नेपाल २३-३ को कठिन स्थितिमा पुगेको थियो ।

त्यसपछि पारसलाई साथ दिन आएका सन्दिप जोरा र पारसको १३ बलमा ३३ रनको आक्रामक साझेदारीद्वारा नेपालको पारीले गति लिएको थियो । कप्तान पारस १४ बलमा २९ रन जोड्दै छैटौं ओभरमा आउट भएका थिए । सोही ओभरमा पारसले १ छक्का र १ चौका समेत प्रहार गरेका थिए ।

नवौं ओभरमा सन्दीप जोरा २८ रनमा आउट भएका थिए । ११ बलको सामना गरेका उनको पारीमा ३ छक्का सामेल थियो । 

१० रन जोडेका करण केसी अन्तिम ओभरमा बाउन्डरीमा उत्कृष्ट क्याचमार्फत आउट भए भने विनोद र सोमपाल पनि अन्तिम दुई बलमा आउट हुन पुगे र सन्दीप लामिछाने अवजित रहे । विनोदले १३ बलमा २१ रन जोडेका उनको पारीमा २ चौका र १ छक्का सामेल थिए ।

ओडिआईमा २-१ को जितपश्चात टि-२० को पहिलो खेल २१ रनले गुमाएको नेपालले दोस्रो खेलमा ४ विकेटको जित हात पारेको थियो ।