जनताबाट अस्वीकृत भएकाहरुको चुरीफुरी उपयुक्त हुँदैन : प्रधानमन्त्री ओली

प्रधानमन्त्री केपी शर्मा ओलीले जनताबाट  अस्वीकृत भएकाहरुको चुरीफुरी उपयुक्त नहुने टिप्पणी गरेका छन् । नेपाल कम्युनिष्ट पार्टी (ने क पा)को संसदीय दलको बैठकलाई बालुवाटारमा सम्बोधन गर्दै प्रधानमन्त्री ओलीले संसदमा सांसदहरुलाई सरकारका कामकारबाहीका बारेमा डटेर कुरा राख्न पनि निर्देश्न दिए ।

“संसदीय अभ्यासमा अभ्यस्त भइसकेका साथीहरुले अगुवाइ गर्ने नयाँ साथीहरुले त्यसलाई पछ्याउने गर्नुपर्यो,” प्रधानमन्त्री ओलीले भने, “शिर्ष नेताहरुले सरकार, नीति तथा कार्यक्रम र बजेटका पक्षमा खुलेर कुरा राख्नुपर्छ । जसले गर्दा संसद र जनतामा पनि राम्रो सन्देश प्रवाह हुन्छ ।”

संसदमा एक दुईजना उभिएका भरमा संसद अवरुद्ध हुन दिन नहुने प्रधानमन्त्री ओलीको भनाइ छ । प्रधानमन्त्री ओलीले  असोज ३ गतेसम्ममा कानुनहरु बनाइ सक्नुपर्ने भएकोले संसद अवरुद्धताले यो कार्यसूचीलाई असर गर्ने  बताए । “यी सबै काम समयमै सक्नका लागि हाम्रा सांसदहरुले सभामुख र राष्ट्रिय सभाका अध्यक्षलाई बल दिनुपछ,” प्रधानमन्त्री ओलीले भने । 

प्रधानमन्त्री ओलीले सरकारले मन्त्रालय विभाजन भन्नुको कुनै तुक नभएको बताए । “संविधानले २५ वटासम्म मन्त्रालय  र मन्त्री बनाउन अधिकार दिएको छ,” प्रधानमन्त्री ओलीले भने, “त्यस कारण आवश्यकता अनुसार मन्त्रालय विभाजन गरिएको हो ।” वर्तमान सरकार थपना नभएकोले सक्रियतापूर्वक काम गर्ने उनले दाबी गरे ।