जग्गा किर्ते आरोपमा मालपोत अधिकृतसहित ४ कर्मचारी पक्राउ

काठमाडौंको बुढानिलकण्ठमा रहेको ४० आना जग्गा किर्ते गरेर पास गराउन भूमिका खेलेको भन्दै चाबहिल मालपोत कार्यालयका अधिकृतसहित ४ जना पक्राउ परेका छन् । पक्राउ पर्नेमा मालपोत अधिकृत खगेन्द्र अर्याल, नासु रन्जनकुमार खरेल, जमुना कुमारी श्रेष्ठ र रघुनाथ तिमिल्सिना रहेका छन् । महानगरीय प्रहरी प्रभाग गौशालाका डिएसपी सुनिल मल्लका अनुसार उनीहरुले बुढानिलकण्ठमा रहेको चन्दनकृष्ण कायस्थको ४० आना जमिनको नक्कली व्यक्ति खडा गरी किनबेच गर्ने काममा सहयोग गरेका थिए ।

जमिनको श्रेस्ता राख्ने, श्रेस्ता तयार पार्ने र रुजु गर्ने कार्यमा संलग्न भएकाले उनीहरुलाई पक्राउ गरिएको डिएपी मल्लले बताए । मालपोतका कर्मचारीको मिलेमतोमा भएको किर्तेबाट नक्कली लालपुर्जा बनाएर काठमाडौं जिल्ला अदालतबाट नक्कली चन्दन कृष्ण कायस्थको वारीस खडा गरेर कृष्ण देवकोटा लगायतलाई जमीन बेचेको प्रहरी अनुसन्धानबाट खुलेको छ । नियन्त्रणमा रहेका चारै जनालाई वृत्त गौशालामा राखेर आवश्यक अनुसन्धान भइरहेको डिएसपी मल्लले बताए ।