गुठीबारे भूमि मन्त्रीलाई प्रश्न– पत्रकार सम्मेलनबाट विधेयक फिर्ता हुन्छ ?

प्रमुख प्रतिपक्षी दल नेपाली कांग्रेसका सांसदरूले गुठी विधेयक फिर्ताको शैलीबारे मन्त्रीसँग सदनमा प्रश्न गरेका छन् । 

प्रतिनिधि सभामा शुक्रवार विनियोजन विधेयक माथिको छलफलमा सांसदहरूले उठाएका प्रश्नको जवाफ दिने क्रममा मन्त्री पद्मा अर्यालसँग सांसदहरूले प्रश्न उठाएका हुन् ।

नेपाली कांग्रेसकी डिला संग्रौला पन्त, लक्ष्मी परियार, राजन केसी, देवप्रकाश तिमल्सिना लगायतले पत्रकार सम्मेलनमार्फत् विधेयक फिर्ता हुन्छ कि हुँदैन भनेर प्रश्न गरेका हुन् । 

कांग्रेस सांसदहरूप्रति कटाक्ष गर्दै नेकपाका खगराज अधिकारीले प्रश्न गरे– ‘गुठी विधेयक प्रतिनिधि सभामा कहिले पेश भयो ? कहिलेदेखि छलफल गर्नुभयो ? प्रस्ट हुन चाहन्छु ।’

कांग्रेस सांसदका प्रश्नको जवाफमा मन्त्री अर्यालले सूचना लिएर र कानूनी कुरा बुझेर प्रश्न गर्न सुझाव दिइन् ।

‘विषयभन्दा बाहिरका प्रश्नको जवाफ दिनु नपर्ने हो, तर मन्त्रीले जवाफ नदिई भागेको भन्नुहोला । प्रश्न उठेपछि केही त भन्नु पर्‍यो,’ मन्त्री अर्यालले भनिन्, ‘हिजो मात्र निर्णय गरेर प्रक्रिया बढेको छ । माननीय सदस्यहरूले पनि सूचना लिनुपर्‍यो, कानून पढ्नुपर्‍यो ।’

मन्त्री अर्यालले धर्म संस्कृतिसँग जोडिएका भावनात्मक कुरामा सरकार रत्तिभर विचलित नभएको स्पष्ट पारिन् । 

‘उपत्यका बाहिरका धेरै जिल्लामा गुठीपीडित किसानका समस्याको समाधान र अधिकार स्थापित गर्नका लागि विधेयक ल्याइएको हो । हिजो मात्र निर्णय गरेर विधेयक फिर्तिको प्रक्रिया अगाडि बढेको छ,’ उनले भनिन् ।