कांग्रेस केन्द्रीय समितिको बैठक अझै बस्न सकेन, नेविसंघको म्याद थप्ने भए ६ महिना थप्नुपर्ने निर्देशक समितिको सुझाव

नेपाली कांग्रेसको भ्रातृ संगठन नेपाल विद्यार्थी संघको महाधिवेशन समयमै गराउन गठित निर्देशक समितिले वर्तमान समितिलाई नै निरन्तरता दिने भए कम्तिमा पनि ६ महिना थप गर्न सुझाव दिएको छ ।

निर्देशक समितिको भर्खरै सकिएको बैठकले यही समितिलाई निरन्तरता दिनुपर्ने भए कम्तिमा पनि ६ महिना थप गर्न सुझाव दिएको समितिका सदस्य प्रदीप पौडेलले जानकारी दिए । समितिले ३२ वर्षे हद पुनर्विचार गर्नुनपर्ने जनाएको छ । नयाँ समिति ल्याउनुपर्ने भए छलफल गर्न सकिने निर्देशक समितिले जनाएको छ ।

नेविसंघको समयावधि आजबाट समाप्त हुँदैछ ।

केन्द्रीय कार्यसमितिको बैठकमा महाधिवेशनका सम्बन्धमा निर्देशक समितिले विधानमा गर्नुपर्ने परिमार्जनलगायतका धारणा पेस गर्ने बताइएको छ । यसअघि शनिबार निर्धारित समयभन्दा झण्डै ५ घण्टा ढिलो गरी बसेको केन्द्रीय कार्यसमितिको बैठकमा उपसभापति विमलेन्द्र निधिले नेविसघंका बारेमा विषय प्रवेश गराएका थिए । 

पार्टी र नेविसंघमा नैनसिँह महर नेतृत्वको वर्तमान कार्यसमितिको म्याद थप गरेर महाधिवेशन गर्ने र नयाँ केन्द्रीय कार्यसमिति गठन गरेर महाधिवेशन गर्ने भन्ने बारेमा नेताहरुका बीचमा फरक–फरक धारणा रहेको छ । सभापति शेरबहादुर देउवाले आइतबारको बैठकमा सहमतिमै नेविसंघको विषयमा निर्णय गर्ने मनस्थिति बनाएको स्रोतले जनाएको छ । 

निर्देशक समितिका सदस्य तथा केन्द्रीय सदस्य प्रदीप पौडेलले ३२ वर्ष मुनिको नयाँ केन्द्रीय समिति निर्माणका लागि सभापति देउवाले इच्छाशक्ति देखाए सहमतिमै नेविसंघका बारेमा निर्णय हुन सक्ने संकेत गरेका छन् ।  गत भदौ २ गते दुई वर्षीय कार्यकाल समाप्त भएको महर नेतृत्वको केन्द्रीय कार्यसमितिलाई महाधिवेशन गर्नका लागि ३ महिनाका म्याद थप गरिएको थियो । जुन म्याद आइतबार सकिँदैछ ।