काठमाडौं, ३०, कात्तिक । नेपाली राष्ट्रिय क्रिकेट टोलीका स्पिनर सन्दीप लामिछाने इन्डियन प्रिमियर लिगको सन् २०१९ को संस्करण पनि खेल्ने भएका छन् ।
दिल्ली डेयरडेभिल्सले सन्दीपलाई आगामी संस्करणको लागि पनि आफ्नो टिममा समावेश गरेको छ । अघिल्लो सिजनका ठूला खेलाडीहरुलाई टिम बाहिर राख्दा पनि सन्दीप भने दिल्लीमा अटाउन सफल भएका छन् ।
दिल्लीले पछिल्लो सिजनका कप्तान गौतम गम्भीरसँगै अन्य ठूला विदेशी खेलाडीलाई आफ्नो टिममा समावेश गरेको छैन । समावेश नहुनेहरुमा ओपनर जेसन रोय, अष्ट्रेलियन अलराउण्डरद्वय ग्लेन म्याक्सवेल र ड्यान क्रिस्टियन, लियाम प्लंकेट र जुनिअर डाला रहेका छन् ।
त्यसैगरी भारतीय स्पिनर सहबाज नदीम, अलराउण्डर विजय शंकर, अभिषेक शर्मा र विकेटकिपर नमन ओझा पनि टिममा समावेश भएका छैनन् । दिल्ली डेयरडेभिल्समा सनराइजर्स हैदराबादबाट ओपनर शिखर धवनले इन्ट्री गरेका छन् । त्यसैगरी विजय शंकर, अभिषेक शर्मा र सहबाज नदीमले भने हैदराबादमा इन्ट्री मारेका छन् ।
दिल्ली डेयरडेभिल्समा सन्दीपसँगै यात्रा निरन्तरता दिनेमा भने श्रेयस ऐर, ओपनर पृथ्वी शअ, ऋषभ पन्त, कोलिन मुनरो, क्रिस मोरिस, कागीसो रबाडा र ट्रेन्ट बोल्ट रहेका छन् । ऐरले पछिल्लो सिजन अन्त्यतिर टोलीको कप्तानी सम्हालेका थिए । त्यसैगरी भारतीय ब्याट्सम्यान मनाजोत कालरा, जयन्त यादव, राहुल टेवाटिया, हर्षल पटेल, अमित मिश्रा र आवेश खानले पनि सोही टिममा यात्रालाई निरन्तरता भएका छन् ।
