अर्थतन्त्रको गलत आँकडा देखाएर भ्रमको खेती सुरु : कांग्रेस नेता

नेपाली कांग्रेसका वरिष्ठ नेता रामचन्द्र पौडेलले जनतासँग बाँडेका आश्वासनहरु पूरा गर्न नसक्ने भएपछि अर्थतन्त्रको गलत आँकडा देखाएर भ्रमको खेती गर्न लागेको आरोप लगाएका छन् । 

तनहुँको घिरिङ गाउँपालिका–२ मा बिहीबार आयोजित कार्यकर्ता भेलालाई सम्बोधन गर्दै वरिष्ठ नेता पौडेलले जनतालाई कम्युनिष्ट गठबन्धनले बाँडेको आश्वासन अनुसारको काम गर्न नसक्ने भएपछि अर्थमन्त्री युवराज खतिवडाले संसदमा झुठो बोलेको दावी गरे ।  ‘‘जनतालाई विभिन्न आश्वासन बाँडेर बाम गठबन्धनले भोट ल्याए । तर अहिले काम गर्न नसक्ने भएपछि अर्थतन्त्रको गलत आँकडा देखाएर फेरि भ्रमको खेती गर्न लागे,’’ उनले भने, ‘‘उनीहरु अहिले जनतालाई बाँडेको आश्वासन पुरा गर्न नसक्ने भएपछि नाटकमा लागेका छन् ।’’ कम्युनिष्ट एकताको अहिले नाटक मञ्चन भइरहेको जिकिर गर्दै नेता पौडेलले थपे, ‘‘साँच्चै कम्युनिष्ट एकता भएको हो भने कम्युनिष्ट शासन लगाउथे तर यो मिलेर मुलुकको दोहन गर्ने राणनीति मात्रै हो ।’’ 

कांग्रेसले गाउँमा बाटोघाटो, विजुली, शिक्षा, स्वास्थ्य, सञ्चार पु¥याएको बताउँदै पौडेलले अहिले कांग्रेसको उद्देश्य विगतको जस्तो गाउँमा बाटोघाटो, विजुली, शिक्षा, स्वास्थ्य र सञ्चार नभई गाउँमा आम्दानी गाउँमै रोजगारी पु¥याउने भएको बताए । ‘‘अब राजनीतिक व्यवस्थाको टुंगो संविधानले लगाएको छ । अब समृद्धिको बाटोमा मुलुकलाई अगाडि बढाउनुपर्छ’’, उनले भने, ‘‘त्यसका लागि अब गाउँ–गाउँमा आम्दानी  र रोजगारीका अवसर सृजना गर्नुपर्छ ।’’