अपराजित युभेन्टसले मिलानलाई हरायो

 कात्र्तिक २६ : इटालियन सिरी ए अन्तर्गत अाइतबार भएको खेलमा युभेन्टसले एसी मिलानलाई २-० ले पराजित गरेको छ ।

फरवार्ड मारियो मान्जुकिचले अाठौं मिनेटमा गोल गर्दै युभेन्टसलाई सुरुवाती अग्रता दिलाएका थिए । उनले एलेक्स सान्ड्रोको क्रसमा गोल गर्दै दवाव कायम गरे । पहिलो हाफमा थप अवसर पाएपनि युभेन्टसले अग्रता बढाउन सफल भएन ।

मिलानले खेल बराबरी गर्ने सुवर्ण अवसर प्राप्त गरेपनि फरवार्ड गोन्जालो हिगुअाइन त्यसमा सफल भएनन् । मिलानले पाएको पेनाल्टीमा हिगुअाइनको प्रहार गोलरक्षक वजचिएक सेचेज्नीले बचाए । खेलको अन्तिम समयमा युभेले अग्रता दोब्बर पार्यो । क्रिस्टियानो रोनाल्डोले ८३ अौं मिनेटमा गोल गर्दै युभेन्टसको जित पक्का गरे ।

रोनाल्डोले गोल गरेको केहि बेरमै हिगुअाइन लगातार पहेंलो कार्ड खाँदै मैदानबाट बाहिरिए । डिफेन्डर मेधि बेनाटियालाई फल गरेपछि उनले पहिलो कार्ड पाए । तर रिसको झोंकमा राफ्रिको मुखै अगाडि कराएपछि उनले दोस्रो कार्ड पनि पाए ।

यस जितसँगै युभेन्टसले शीर्षस्थानमा ६ अंकको अग्रता कायम राख्न सफल भएको छ । पछिल्लो ६ सिजन लगातार लिग जितेको युभेलाई नेपोलीले पछ्याइरहेको छ । एजेन्सी