अग्नि परीक्षामा पास हुन नसके जोगी बन्न तयार छुः मन्त्री बस्नेत

१४ साउन, काठमाडौं । सामान्य प्रशासन मन्त्री टेकबहादुर बस्नेतले कर्मचारी समायोजनलाई प्राथमिकतामा राखेर काम गर्ने बताएका छन् ।

संघीय संरचना अनुसार तीनै तहमा कर्मचारी समायोजन गर्नु तत्कालीन आवश्यकता भएको भन्दै मन्त्री बस्नेतले समायोजनको काम छिटो भन्दा छिटो सम्पन्न गर्ने योजनाका साथ काम गर्ने बताए ।

अहिले पनि सिंहदरबारमा बसेर थार्काएर कान नगरी खाने कर्मचारीहरु रहेको भन्दै उनले त्यस्ता कर्मचारीलाई तह लगाउने बताए । ‘हाम्रा कति कर्मचारीहरु बसी खानेछन्’ उनले भने, ‘सिंहदरबारमै बसेर काम नगरी थर्काएर खानेहरु पनि छन्, उनीहरुको व्यवस्थापन पनि हुन्छ ।’

सल्यानी युवा सञ्जाजले आयोजना गरेको बधाई तथा सम्मान कार्यक्रममा मन्त्री बस्नेतले कर्मचारीका क्षेत्रमा रहेका र अन्य क्षेत्रका विज्ञहरुसँग मिलेर काम गर्ने बताए ।

आफूले मन्त्री पदलाई अवसर र अग्नि परीक्षाका रुपमा लिएको भन्दै उनले समग्र देशबासीको शीर उच्च पार्ने गरी काम गर्ने प्रतिबद्धता जनाए ।

साथै अग्नि परीक्षामा उत्तीर्ण हुन नसके जोगी भएर हिँड्न तयार रहेको मन्त्री बस्नेतले बताए । ‘यो मेरा लागि अवसर हो र अग्नि परीक्षा पनि हो,’ मन्त्री बस्नेतले भने, ‘यदि यो अग्नी परीक्षामा पास हुन सकिन भने जोगी भएर हिँड्न पनि तयार छु ।’

कार्यक्रममा सल्यान निर्वाचन क्षेत्रक्षेत्र नं. २ का सांसद तथा अर्थ समितिका सभापति प्रकाश ज्वालाले एउटै जिल्लाबासी भएकोले मन्त्री बस्नेतलाई हिरो भएर मात्रै मन्त्रालयबाट निस्कन सुझाव दिएका छन् । ‘एउटै जिल्लाबासी र साथीका नाताले म उहाँलाई सहयोग गर्छु’ उनले भने,’यही मन्त्रालय सम्हालेका लालबाबु पण्डित र रेखा शर्मा राम्रो काम गरेर हिरो भएर निस्किए, तपाई पनि त्यसरी नै निस्कनु पर्छ ।’

कार्यक्रममा सल्यानबासीहरुले बहुदलपछि सल्यानले पहिलो पटक मन्त्री पाएको भन्दै मन्त्री बस्नेतलाई सम्पूर्ण सल्यानीहरुको शीर उच्च हुने गरी काम गर्न सुझाव दिएका थिए ।