पार्टी एकताबारे निर्णय लिन अाजै एमाले स्थायी समिति बैठक

नेकपा एमाले स्थायी कमिटीको बैठक बोलाएको छ । बुधबार दिउँसो ४ बजे प्रधानमन्त्री कार्यालय बालुवाटारमा बस्ने बैठकले पार्टी एकताबारे निर्णय लिने बुझिएको छ ।

uml-meeting

बैठकले पार्टी एकता, मोदीको नेपाल भ्रमण र जेठ ७ गते सरकारले ल्याउन लागेको नीति तथा कार्यक्रमको विषयमा पनि छलफल हुने एमाले स्रोतले जनाएको छ । एमाले-माओवादी एकताबारे आशंक र असमझदारी बढिरहेको बेला बोलाइएको बैठकले यसबारे ठोस निर्णय गर्ने एक एमाले नेताले जानकारी दिए ।

एमाले अध्यक्ष एवम प्रधानमन्त्री केपी शर्मा ओलीले मंगलबार काठमाडौंमा आयोजित एक कार्यक्रममा ‘दुई पार्टीका नेताहरुलाई दुईतिर फर्केको तस्बीर राखेर गलत प्रचार गर्नेहरुलाई अहिले सन्तोष मान्न दिऊँ तर हामी दुई र तीन दिनको समय राखेर एकताको मिति घोषणा गर्न सक्छौँ । पत्रकारहरु भोलि बालुवाटरमा हेर्न आए हुन्छ’ भन्ने अभिव्यक्ति दिएका थिए ।

ओलीको अभिव्यक्तिलाई पछ्याउँदा आजको एमाले बैठकले एमाले-माओवादी एकताबारे निर्णय हुनसक्ने अनुमान गरिएको छ । जेठ ७ गते सरकारको नीति तथा कार्यक्रम ल्याउनु अगाडि नै एकता हुन सक्ने पनि केही नेताहरुले दावी गरिरहेका छन् । मोदी भारत फर्किएलगत्तै एमाले अध्यक्ष ओली र माओवादी केन्द्रका अध्यक्ष प्रचण्डबीचको भेटवार्ताले एकता गर्नेबारे निर्णय लिएको एक माओवादी नेताले जानकारी दिए ।

NOC1-250x300