जर्मनी विश्वकप फुटबलका लागि छनोट, अर्जेन्टिना कठिन मोडमा

२० असोज, एजेन्सी ।

साविक विजेता जर्मनी २०१८ को विश्वकप फुटबलका लागि छनोट भएको छ । गएरातिको खेलमा नर्दन आयरल्याण्डलाई तीन–एक गोलले हराउँदै जर्मनीले विश्वकपमा स्थान सुरक्षित गरेको हो ।

जर्मनी विश्वकपमा लगातार ८३ वर्षदेखि छनोट भइरहेको छ । समूह ‘सि’ मा रहेको जर्मनीले ९ खेलबाट २७ अंक जोडेको छ भने दोस्रो स्थानमा रहेको नर्दन आयरल्याण्डको समान ९ खेलबाट १९ अंक छ । नर्दन आयरल्याण्डको विश्वकपमा छनोट हुने सम्भावना कायमै छ ।

त्यस्तै, स्लोभानियालाई एक–शुन्यले हराउदै इंग्ल्याण्ड पनि विश्वकपमा छनोट भएको छ । इङल्याण्डका लागि एक मात्रै निर्णायक गोल क्याप्टेन ह्यारी केनले गरेका हुन् ।

समूह ‘एफ’ मा रहेको इंग्ल्याण्डलाई विश्वकपमा छनोट हुन खेल बराबरी गरे पुग्ने थियो । तर, खेल सकिन केही मिनेट मात्रै बाँकी हुँदा ह्यारीले गोल गर्दै विश्वकप इङ्ल्याण्डको विश्वकप यात्रा सहज बनाएका हुन ।

उता, दक्षिण अमेरिकी मुलुक अर्जेटिना भने सन् दुई हजार अठारको विश्वकप छनोटको कठिन मोडमा पुगेको छ । आज विहान भएको खेलमा पेरुसँग गोल रहित बराबरी खेलेपछि स्टार स्ट्राइकर लियोनन मेस्सीको टिम अर्जेटिनाको विश्वकप यात्रा कठिन बनेको हो ।

खेलमा अर्जेन्टिनाले पेरुलाई दवावमा राखेपनि गोल गर्न सकेन । दक्षिण अमेरिकाको समूहबाट शीर्ष चारमा पर्ने समूह सिधै विश्वकपमा छनोट हुनेछन् । पाँचौ स्थानको टिमले न्यूजिल्याण्डसँग प्ले–अफ म्याच खेल्नु पर्नेछ ।

अर्जेन्टिनाले अर्को साता इक्वेडरसँग खेल्ने छ । इक्वेडरसँगको खेल जिते पनि अर्जेन्टिनालाई विश्वकपमा छनोट हुन अरु टिमको खेलमा भर पर्नुपर्ने छ ।

ads